Sut i wella eich sgôr credyd

17/10/22

Mae sgoriau credyd yn offer ariannol sy’n penderfynu a fyddwch chi’n cael benthyciadau, pa gyfraddau llog y byddwch chi’n eu talu, a llawer mwy. Erbyn heddiw mae’r sgoriau hyn wedi dod yn rhan hanfodol o’n bywydau ariannol, ac yn fetrig i fesur ein hiechyd ariannol.

Dyma 6 ffordd y gallwch wella eich sgôr credyd:

  1. Profwch ble rydych yn byw – Cofrestrwch ar y gofrestr etholiadol yn eich cyfeiriad presennol. Gallwch wneud hyn hyd yn oed os ydych mewn llety a rennir, neu’n byw gartref gyda’ch rhieni. Mae cofrestru i bleidleisio yn helpu benthycwyr i gadarnhau eich enw llawn a’ch cyfeiriad sydd hefyd yn helpu i roi hwb i’ch sgôr.
  2. Adeiladwch hanes credyd – Mae hi’n anodd i gwmnïau a benthycwyr eich asesu heb unrhyw hanes o gredyd. Mae talu am eich ffôn symudol a threth car drwy ddebyd uniongyrchol yn ffyrdd o hybu eich sgôr credyd a chreu hanes credyd da.
  3. Defnyddiwch gredyd isel – Eich defnydd credyd yw’r ganran o’ch terfyn credyd a ddefnyddiwch. Er enghraifft, os oes gennych gyfyngiad o £1000 a’ch bod yn defnyddio £500, eich defnydd yw 50%. Mae’n ddelfrydol cael defnydd credyd o lai na 30% i fenthycwyr eich trin yn ffafriol.
  4. Gwnewch daliadau rheolaidd yn brydlon – Mae talu eich holl filiau mewn modd amserol yn hanfodol gan y bydd yn dangos i fenthycwyr eich bod yn ddibynadwy ac yn gallu trin credyd yn gyfrifol.
  5. Gwiriwch am wallau a rhowch wybod am unrhyw gamgymeriadau – Parhewch i wirio eich adroddiadau credyd i wneud yn siŵr bod popeth yn iawn, nad oes unrhyw gamgymeriadau, a bod y wybodaeth yn gyfredol. Croes wiriwch eich cyfeiriad a manylion personol eraill i wneud yn siŵr eu bod i gyd yn gywir gan y gallai unrhyw wybodaeth a gamdeipiwyd effeithio ar eich sgôr a gallai fod yn ddigon i fenthyciwr wrthod rhoi credyd i chi.
  6. Ystyriwch gael cerdyn credyd adeiladol – Gall cerdyn credyd adeiladol eich helpu i ailadeiladu eich sgôr credyd, ac fel arfer mae ganddynt derfynau gwariant isel a chyfraddau llog uwch. Maen nhw’n dda iawn i bobl sy’n gwario symiau bach bob mis, ond mae angen i chi dalu’n ôl yn brydlon bob mis i osgoi talu unrhyw log.

Mae gwella’ch sgôr credyd yn broses sy’n cymryd amser, ac yn anffodus ni fydd yn digwydd dros nos. Mae’n bosibl y bydd gan bob benthyciwr ffordd wahanol o wirio’ch sgôr credyd yn dibynnu ar eu meini prawf benthyca a’r wybodaeth y mae ganddynt fynediad ati.

Os ydych chi’n ystyried cychwyn busnes, mae’n werth nodi bod Benthyciad Cychwyn Busnes yn cynnig llog cyfradd sefydlog o 6.19% APR felly ni fydd eich llog yn newid yn seiliedig ar eich sgôr credyd. Fodd bynnag, wrth wneud cais am y benthyciad personol hwn at ddefnydd busnes, mae’n dda dangos bod gennych sgôr credyd iach.

Os oes angen cyngor neu arweiniad busnes arnoch ar sut y gallwch sicrhau bod gennych sgôr credyd iach cyn gwneud cais am Fenthyciad Cychwyn Busnes, cysylltwch â’r tîm heddiw drwy’r wefan